14 - 15週

經過左2個禮拜 .. 又係見豬脾既時候啦!!!

睇醫生前一日 .. 連豬脾爸都緊張起黎 ..

因為今次見醫生應該大概知道豬脾是男孩子定女孩子啦!!!

豬脾爸話其實男同女都無所謂 .. 佢都咁鐘意咁錫佢 :D

今次都係睇施醫生 .. 上到去先知要驗vv (因為前幾次都無驗 .. 所以我已遺忘有哩件事)

我又完全無vv既意思 .. 結果要狂飲水 .. 飲到個水機都無哂水(汗!)

終於去到vv .. 姑娘check左ok .. 無幾耐就入去見醫生啦!

今次再見豬脾 .. 見到佢又大左好多 .. CRL 有成10.68 cm ..

身長長到連個超聲波都show唔哂出黎 .. 哈哈!

豬脾 .. 好多謝你每日響媽媽個肚到好努力咁成長 ..

雖然媽媽好曳 .. 偷食零食之餘 .. 又無乜點戒口(係堅持到唔食魚生 .. 自我安慰地覺得已經好叻) 我實在是個唔稱職既媽媽 >.<

醫生話黎到哩個週數 .. 唔只可以度CRL .. 仲可以度埋bb既頭圍/腹圍/大腿骨的長度 ..

全部度出黎既數字都好好 .. 仲比我原先既週期大3~4日 .. 醫生話睇size暫時係中碼至大碼bb !! 好安慰呀!!!

Check 埋心跳一切正常 .. 跟住到check 胎盤 .. 醫生話我個胎盤同產道好接近 .. 有少少偏低既情況 (OmG! 即係點？我完全0認知) 醫生話照埋先出去慢解釋 ..

跟手睇埋4D(施醫生例牌會做) .. 見到豬脾又好多動作啦! 有個動作係好似聽緊電話咁 .. 好可愛呀!! 氹得佢爸爸幾開心 XDD

豬脾爸忍唔住要問醫生bb既性別 (勁心急!!!!!)

um

.

.

um

.

.

um

.

.

um

.

.

um

.

.

唔開估住! 因為未好confirmed!

等 99% confirmed 再公佈 !!!! 

抹乾淨d gel 著返褲 .. 就出去聽醫生解釋胎盤果個問題 ..

原來哩個叫胎盤前置 .. 分左1~4期 ..

醫生話28週前普遍孕婦會先介定為胎盤低先 .. 大部分孕婦會隨住週數同肚肚增大 .. 胎盤會逐漸向上移 .. 叫我地唔洗擔心住

但佢remark左哩個point響我個report 到 .. 下次返黎照時要再follow !

仲開埋孕婦維他命(Materna)比我 :)

豬脾 <3<3

12 ~ 13週

照Oscar 篇

請左半日假去廣華照Oscar ..

臨去之前仲食左串辣魚蛋(哩個媽媽實在太曳喇! XoX)

準時1:45pm到達N10 .. 登記完就入房仔睇電視 ..

內容係講” 唐氏綜合症” 既成因、檢測方法、需要面對既問題等等

同我同時間睇電視大約有4-5 pair人 .. 個個都有老公陪伴 .. 得我一個無!!

好彩老公趕得切響入房檢查前到達 .. (呼呼~ 好彩)

等左約半個鐘就叫名入房 .. 除鞋上床 .. 拉高件衫就ok

幫我照既係係伍淑珍姑娘 .. 佢既態度 .. 非常「一般」

一開USG .. 見到bb 揮哂手 .. 今次明顯又大個左 .. 清楚見到有手指骨 .. 仲不斷吞口水添!! 哈哈 .. 好可愛!!

姑娘大約照左15mins .. 間中見佢搖頭嘆氣 .. 我仲以為有咩事

原來係bb唔係幾合作 .. 一係就擰轉面用個背隻得住姑娘 .. 一係就玩蜈蚣彈 .. 郁黎郁去! 姑娘仲嘗試打我個肚(雖然唔係痛 .. 但都唔係幾舒服同唔開心)

結果搞左好耐都照唔到 .. 姑娘有d 黑黑地面(@.@) Well .. 我明白! 唔係第一次聽廣華d 姑娘有幾唔friendly

結果我地要出去行下 .. 等佢再叫名入返去再照 ..

出去買左野飲行左陣就返去 .. 咁樣一等 .. 又等左個幾鐘

差唔多4點再入返去照 .. 今次再照 .. bb 都係non-stop moving !!

今次姑娘仲發出不耐煩既”jip jip” 聲 !! 我同老公都對哩位姑娘既態度相當不滿

今次照左唔夠10 mins .. 就叫我落床再出去行下!! (無錯! 第2次喇!!! )

出到去見到出面得返我同另一pair 人 .. 而且醫院既office hour 都就過喇!!

行左陣 .. 又叫返我地入去 .. d gel 已經搞到我個肚肚” lup痴痴”

今次好驚再照唔到 .. 姑娘仲嚇我話唔好打破紀錄 (曾經有人連續3日都返去照 =0=”)

今次見到bb 已經開始累了 .. 無再郁得咁勁 .. 可能已經比姑娘玩到好眼訓訓左! 照左15mins 到 .. 姑娘終於度到喇! (Oh! Thanks God!)

姑娘解釋話bb 頸皮1.57cm .. 屬於正常範圍!! 叫我去度高磅重+抽血先好走

由於已經醫院已過左辦工時間 .. 見到只得返幾丁姑娘響到做野

抽血 .. 先試右手 .. 我已經唔敢望 .. 但都感覺到吉左好多下都未抽到 .. 只係感覺到好痛 .. 跟住換左手 .. 姑娘換左支幼針 .. 好彩今次一野就成功! 但我已經覺得好痛苦 >.< 結果我左右手都係傷口 .. 要老公幫忙貼膠布

玩到5點幾先走得 .. 感覺仲辛苦過返工!! 快快趣去食碗粉醫肚先 .. 餓死我喇!

總結：預左睇政府係時間長同態度麻麻 .. 但經歷過先知原來真係咁差! 無辦法喇! 同比錢睇私家係差好遠架喇! 為左慳$6k 要忍受下 L

順利完成Oscar Test .. 我終於可以向外公佈 .. 我懷孕了!!

同時 .. 可以公開bb既乳名★★★★ 豬脾 ★★★★ 啦!! 

10 ~ 11 週

我已經開始適應所有早期孕徵 .. 胃口亦開始好返d ..

最起碼夜晚我都食到少少 .. 終於挨過左要望住碗通粉喊既日子啦 >.<”

個肚亦開始微微隆起 (其實對於本身都有小肚腩既我黎講 .. 佢只不過係比平時大d &實d既肚腩而已 XDD)

但我已發現屋企裡面既牛仔褲已經唔岩著了 .. 變得好緊!!!!!

我買定左幾條孕婦既legging .. 但仲未著 .. 因為普通legging 我都仲著到 .. 只不過要著低腰 .. 以唔cool 住bb為大前提! 老公就係因為哩樣野 .. 成日話我虐待bb .. 迫佢住劏房 =_=

Well .. 入返正題先 .. 等左漫長既兩個星期 .. 又係可以見bb既時候啦! 哩個已經成為我地兩個最期待既節目!!

一樣睇返施醫生 .. 不過今次等得耐左! 診所入面多左好多大陸夫婦! 有pair仲有個中介人帶住黎睇醫生!!

等左差唔多1個鐘 .. 終於叫我名啦!!

今次再照已經好清楚見到bb大左好多啦!! CRL有6cm .. 醫生話照size黎睇 .. bb已經有12W3D啦! 比起預期又大左左5日! 我諗同我日日都食蛋&訓得多好有關係!

見到bb開始成人形 .. 清楚見到有手腳 .. bb仲好活躍 .. 不停揮動手腳!!! 又玩蜈蚣彈 .. 氹得老公幾開心!!

醫生又再次開4D比我地睇(言談間都夾雜住讚美部機幾新幾勁)

今次4D清楚過上次好多! 因為bb開始成形 .. 見到個衰豬舉高對手遮住塊面唔比我地睇佢! (其實媽媽心裡默默念著” 好可愛啊” xoxo)

聽埋心跳就走得啦! 順到想叫醫生開d 鐵丸比我食 .. 因為我懷疑自己唔夠血所以而家成日見暈 @o@ .. 但醫生話証實到貧血先准開 >.<

見到bb好努力咁長大 ..  心入面其實好開心好欣慰 =]  繼續努力呀! 我個寶貝>3>3

8週 ~ 9週

哩兩星期 .. 日子好似度日如年一樣咁辛苦！

夜晚食唔到野 .. 明明肚餓都食唔落 ..

記得有一晚更加望住碗通心粉喊哂!! 嗚嗚 .. 陰公豬!

希望辛苦既頭3個月快d 挨過啦!!

不過 .. 雖然辛苦 .. 但每2週1次既產檢可以比我見下bb的確可以將所有失落痛苦暫時放低

19/10/2013 .. 今次轉左醫生 .. 聽bk d jm介紹去睇施聰白醫生

診所Location 依然係尖沙咀 .. 上到去唔算太多人 .. 感覺都ok!

等左陣就到被叫名入去 .. 施醫生好清楚咁解釋9W既bb大概係點既樣 .. 照U/S會睇到d 咩 .. 跟住我就入去U/S房啦 .. 老公可以全程陪伴在側 =]

今次唔再用陰超啦 .. 響肚肚到查d gel 就可以啦!

bb比起上次照大左好多呀 .. 開始成形 .. 清楚見到頭同身 .. 仲有手手腳腳

頭同身既比例仲係1:1 .. 好卡通呢!! 施醫生話bb大d就會開始發育身體部分 .. 到時就唔會比例1:1了!!  醫生又貪得意開埋4D比我地睇 .. 哈哈! 不過bb始終太細 .. 唔太清楚見到個樣 .. 都係2D容易d睇!!

今次已經見到bb開始fing fing下d手腳啦!! 好可愛啊!!!!

施醫生仲驚我地唔識睇 .. 拎左個胎形既模形出黎解釋 .. 嗯!! 頓時非常清楚

跟住有再比我地睇閃閃(心跳) .. 由於上次老公無陪我產檢聽bb心跳 .. 所以今次請施醫生再播1次比我地聽 .. 每分鐘185下 .. 好快啊!! (心裡面輕輕哼起一句歌詞：聽著懷中的心跳讚造物神奇)

今次一樣照到有個水囊 .. 都成5. 2cm .. 施醫生話抱觀望態度 .. 一般都會3個月後會慢慢消失 .. 只要我唔痛唔出血就無事 .. ( 雖然上網search過原來好多人第1胎都會有水囊出現 .. 但大部分都會慢慢消失 .. bb會吸收左! 但其實都有點兒擔心 >_<)

bb .. 我地又要兩星期之後先見啦!!